網上瘋傳閉路電視片段，

一男一女在天恒邨大廈升降機內憑空消失，

到底是惡意玩笑，還是兩人誤闖「凶間」？

 

（此為《香港都市傳說》書中收錄原汁原味粵語版，如需翻譯年糕請由此去）

 

「阿忠，你睇下啲樓盤，又貴咗啦！我哋點算呀？」一個只有二十來歲的女生，正用那誇張又尖銳的聲音，在一名男生身邊大喊。

「Tina，唔緊要啦，我哋依家住嗰度都幾好呀！」這名叫阿忠的男生，正嘗試安撫身邊這名稱為「女朋友」的生物。

「幾好？好乜鬼嘢呀，你嗰度公屋嚟㗎！我唔係話公屋唔好呀，咁你都要諗下將來㗎嘛！唔通我同你結咗婚，我又搬埋嚟住囉喎！你諗下你屋企幾多人？你仲要同你細佬同房，咁到時我點呀？同你喺下格床瞓，你細佬就瞓上格床咁呀？仲有呀......」Tina 聽完阿忠的回答，便開始發起牢騷來。

阿忠在一旁不敢作聲，只能不斷點頭回應，因為他知道，Tina 一旦開始提出結婚買樓這些話題時，他不論回答甚麼，都只會換來吵架收場。

所以，在累積了好幾次戰死沙場的經驗後，他學懂了沉默是金的道理，雖然耳朵需要承受將近一小時高分貝的噪音攻擊，但總比吵架時帶來的物理性傷害來得划算。

趁著Tina 在吵鬧的時間，先跟大家介紹一下，阿忠，全名謝兆忠，二十八歲，大學畢業出來工作了數年，總算由Teller 升做General Banking Officer。

這兩個職位有甚麼分別？

簡而言之，Teller 只是櫃枱員工，負責一般銀行事務；而General Banking Officer 需要負責跑數，但請不要誤會，這絕不是一份多勞多得的工作。

自從金融風暴、歐債危機......唉，原因多得不想細說，總括來說就是一個字：難！

過往月入六位數的員工，現在業績能做到每月達標已是十分不錯。

像阿忠這種新人，每天就是受盡責罵和加班的煎熬！

另外，阿忠這個位置，每天所受的氣，簡直不是一個正常人能夠忍受的，但阿忠仍然能勉強撐下來。

為甚麼？

還不是為了自己和Tina 的將來。希望早日跟Tina 組織家庭的這個心願，即使再辛苦也好，為了生活，他只好忍了。

說到Tina，她比阿忠小了一歲，是阿忠在大學時的學妹。

近水樓台，阿忠便是這樣贏得了Tina 的芳心。那時的Tina 並不像現在這樣，她不會發牢騷，不會為了住屋而跟阿忠吵架，也不會為了金錢而去發脾氣。

以往他們可以簡簡單單，在公園逛逛、到茶餐廳吃個快餐、喝杯用苦澀檸檬泡出來的檸茶，便已經開開心心的度過一天了。

但無奈社會逼人，Tina 出來工作後，很快便認識到世界的殘酷，也了解到過往的自己是有多天真！

所以她經常跟阿忠去討論將來，甚至會忍不住對阿忠發牢騷。

每次Tina 對他發牢騷時，阿忠實在很不高興，只是工作時訓練出來的忍耐力，使他一次又一次的強忍。

「我其實都係想同你一齊先諗咁多嘢，你明唔明呀？」Tina 經過差不多一小時後，最後無力的說。

「我明，我梗係明啦！我應承你會努力儲錢，同埋我都有諗過㗎，每次出居屋我都有抽㗎。同埋，最近圍村啲村屋都幾靚㗎，我哋搵日一齊去睇下啦。」阿忠知道，當Tina 發完牢騷後，只要自己能夠說出一些比較實際的計劃，便能成功安撫Tina。

果然，這次也成功了，Tina 的怒火平息了。

約會結束後，阿忠送了Tina 回柴灣後，他便獨自乘坐港鐵回天水圍。

對，你沒有看錯，Tina 真的是住在柴灣，阿忠亦的確是住在天水圍。但千萬不要誤會，是阿忠自己要送Tina 回家的，Tina 從沒有提出過這樣的要求，只是某次阿忠到Tina 家作客時，剛好碰到鄰居在大吵大鬧，之後更拿出菜刀在走廊失控胡亂揮舞。最後雖然沒有任何人受傷，但也驚動了整個樓層的人。自此以後，不管平日工作有多累，阿忠都盡可能送Tina 回家。

在車程中，阿忠認真地考慮買樓的事情，但不論如何計算，他實在無法支付那高昂的首期，還有每個月固定的供樓費用......想著想著，他便在西鐵車廂裡睡著了。

此時，他發了一個夢，他夢見自己送Tina 回家，在Tina 進門前的一刻，那失控的鄰居突然出現，用菜刀不斷砍向Tina，鮮血如泉湧出。阿忠欲阻止那人的時候，卻也被對方在脖子上劃了一刀，死不瞑目的倒在地上。

夢到這裡便完結了，阿忠醒來時嚇出了一身冷汗。

他抬頭一看，發現下一站是元朗，幸好還未過站。

經過了差不多一個多小時，阿忠總算回到天恒邨了。

就在他踏進大廈大堂時，已經接近晚上十二時，這個時間竟然仍有數名住戶正與保安討論著甚麼。

阿忠雖然疲倦，但也著實好奇，於是便慢慢靠近他們。

「華叔，乜咁夜仲咁多人喺度嘅？有咩傾呀？」阿忠也算老住戶了，所以他決定直接問道。

「忠仔，今晚又咁夜呀，同女朋友去玩呀？無呀，啱啱呢幾位住客打嚟投訴十八樓黃生個單位好嘈，我咪上去睇囉！上到去又話無事啦！跟住隔咗一陣佢又嘈，我來來回回去咗三次，之後先靜返。真係被佢玩死！」華叔無奈地說。

「係啦，我住樓下都聽到呀！幾鬼嘈呀！」陳師奶也搭話。

「你都好啲呀，我住正佢樓上呀，幾應聲呀，搞到我個仔係咁喊係咁喊，依家先有時間落嚟抖下氣。」李師奶抱怨。

「你哋都好呀，淨係聽聲，我住佢對面，你哋知今日幾鬼焗㗎啦，我哋諗住慳錢唔開冷氣，咪開住道門囉！跟住呀，頭先佢哋嘈交嗰陣呀，我見到成隻拖鞋飛咗出走廊。我仲見到好似有掟盒呀，好在道鐵閘擋一擋，先無掟去我哋度！」張師奶看來最受影響。 

「吓？咁你仲見唔見到佢哋之後點呀？」陳師奶問。

「無啦，見到咁嘅情況我哋仲唔閂門咩！我跟住咪打落嚟搵華叔囉！華叔真係麻煩你啦！」三名師奶跟華叔道謝。

「唔使客氣，我應該做嘅。係呢忠仔，你都係住十八樓㗎喎？」華叔突然想起。

「我？係呀，黃生就喺我隔籬嗰間屋。」剛剛聽到消息的阿忠，也不禁有點擔憂。

因為在他小時候，天水圍的治安不是很好，亦經常有一些家庭暴力和倫常慘案發生。

他曾目睹鄰居拿著菜刀傷人，所以在長大後，對保安方面都十分重視。這也是另一個，他會這麼緊張Tina，盡量送她回家的原因！

了解情況後，他便跟華叔和幾位師奶道別，搭乘升降機回到自己的樓層。

在經過黃先生的單位時，他不禁偷偷看了一下，只見那緊閉的大門上，能看見有好幾處破損的地方，看似是硬物撞擊而成的。

「返嚟啦？」一把低沉的聲音問阿忠，這聲音的主人正是阿忠的父親，謝兆康，姑且稱他為忠爸吧。

「係呀，咁夜都未瞓嘅？」阿忠回到房間，只見他弟弟已經在上格床安睡，他躡手躡腳走進去放好背包，便回到大廳中。

「唉，我都想瞓！頭先隔籬嘈到拆天咁，咪被佢哋嘈醒咗囉！」忠爸手上拿著一罐啤酒，仰頭喝了一口。

「我頭先喺樓下都聽到華叔講，知唔知嘈咩啫？」阿忠也拿了一罐啤酒，坐到忠爸身旁。

「我無聽晒呀，可能又係錢銀問題啦。唉，香港人依家搵錢，邊似我哋以前，肯做就有呀！」忠爸搖了搖頭。

「唉，又係錢......」阿忠垂下頭，深深嘆了一口氣。

「點呀衰仔，又煩緊唔夠錢買樓呀？老竇咪講過囉，我都有啲錢，你可以......」忠爸搭著阿忠膊頭，卻被阿忠打斷了他的話。

「老竇唔使講啦，啲錢你留返嚟享下福啦，買樓啲嘢我會搞掂㗎喇！我同Tina 有計劃㗎喇！」阿忠反過來搭著忠爸，堅定地說。

「唉......好啦，有咩唔掂就同老竇講啦！唔好搞到好似隔籬屋兩父女咁就得㗎喇！」

忠爸也不再多言。

「收到，老竇你都唔好飲咁多啦，早啲休息啦！」阿忠一口氣把啤酒喝掉，準備回房。

「得啦，我陪多你阿媽一陣就瞓啦！」忠爸指了指櫃內的一張黑白照，照片內就是阿忠的母親，她因癌症而離世多年了。

阿忠看了看照片，對忠爸點了點頭後，便回到床上睡覺了。

但滿腦子都是「買樓」、「慘劇」、「家庭糾紛」等等的事情，他在床上輾轉翻側良久，才能沉沉睡去。

由於胡思亂想的關係，阿忠很晚才能睡著。當他隔天醒來時，發現自己已經遲到了，所以到了晚上他只好獨自留在公司加班來追趕進度。

結果他回到家時，已差不多晚上十一時了。怎料，在大廈的大堂裡，又聚集了不少住戶，正跟華叔交談著。

「華叔，今晚又咁熱鬧嘅？唔係又係黃生呀？」我半開玩笑的說，華叔卻露出了一個無奈的表情。

「唉，係呀。今日兩父女嘈得仲勁過噚日，噚日我上到去，佢哋都至少扮下嘢，我今日去嘅時候，佢哋見我喺度都照嘈，搞到爭啲報警咁滯。」華叔語帶不滿地說。

「咁嚴重？」阿忠也驚訝地說，畢竟在這裡住了超過十年，黃先生一家的確經常吵架，但要出動到警察的，這可是十年來頭一遭。

「係呀，頭先我喺對面睇到，爭啲被佢哋嚇死。本來我同屋企人食緊飯㗎嘛，點知對面屋突然間有人嗌晒救命，本來我只係望望下，點知無啦啦又有嘢飛埋嚟我哋道鐵閘。今次你知唔知咩嚟呀？係刀呀！跟住就見黃生衝出嚟執返把刀又話要斬死佢個女咁，驚起上嚟我咪通知華叔囉！係喎忠仔，頭先你老竇都有出嚟勸交㗎。」住對面的師奶說。

「吓？唔係啩？佢無事呀？咁唔講啦，我返上去先！」阿忠緊張地說。

我趕緊回到家中，只見忠爸正在客廳看電視。

「咦，返嚟啦？餓唔餓呀，我煲咗湯，裝碗畀你飲啦！」忠爸慢慢走到廚房，看來沒有受傷，阿忠也放下心來。

「唔該老竇。聽華叔講，頭先你走咗去勸交喎，下次唔好搞啲咁危險嘅嘢啦！啲人嘈起上嚟真係咩都做得出㗎！」阿忠喝了口湯，然後又擔心起來。

「怕咩，你老竇我幾大隻先得㗎！仲有，十幾年街坊，唔通真係睇住佢哋出事咩？我都無做啲咩，係勸下交啫。」忠爸坐了下來，一臉不在乎。

「係啫，但真係小心啲啦，頭先喺樓下佢哋先講，黃生佢拎埋刀出嚟，安全為上呀老竇。」阿忠仍然放心不下。

「生果刀啫，小事！得啦，總之老竇會睇住㗎啦，你照顧好自己好過啦，晚晚都咁夜瞓！好啦，飲完啦嘛，我幫你洗啦，沖完涼早啲瞓啦！」忠爸把碗接過來後，便慢慢走進廚房，阿忠則進了浴室，洗刷一整天的疲勞。

之後連續數天，阿忠每晚回到大廈，也會在大堂看到華叔和一眾師奶，聽說黃生的吵鬧次數和程度也日漸嚴重了。甚至在阿忠睡覺時，也會聽到隔壁屋傳來爭執聲。

「阿忠！阿忠！你做咩無晒反應㗎？」Tina 看著阿忠，不解地問。

「無......無呀，最近唔夠瞓啫。」阿忠無精打采地回應後，便繼續吃飯。

「係喎，好耐無去探過世伯啦，橫掂聽日星期六，不如聽晚上你屋企同世伯食飯啦。」

Tina 知道阿忠經常要加班，所以她偶爾會提出陪伴忠爸的建議。

「唔......唔好啦，呢排屋企唔係咁方便。」

「吓？點解呀？」Tina 不解的問。

「唉，隔籬屋呢排都唔知咩事，日日都嘈生晒！早兩晚呀，屋主仲拎埋刀出嚟，好在最尾無事。我驚陣間你嚟到佢哋又喺度嘈，咁就唔好啦！」阿忠略帶不安地說。

「你就係因為咁瞓唔好呀？」Tina 擔心地問。

「少少啦，呢排佢哋就連零晨嗰陣都會喺度嘈，有時阿爸忍唔住又會過去勸交，搞到我又擔心佢去勸交會有咩事，咁咪成日都瞓唔到囉......」阿忠坦白地說。

「阿忠......咁你今晚唔好送我返去啦，好無？不如聽朝同世伯飲茶啦，唔去你屋企食飯都要陪下佢㗎嘛！」Tina 就是這樣，當阿忠有任何煩惱，也會站在他的立場去為他著想。

「Tina......唔好啦，呢幾日隔籬咁樣，啲人癲起上嚟真係無咩性，你嗰邊又雜，我都係送你返去好啲！」阿忠還是放心不下。

晚飯過後，阿忠正想送Tina 離開時，手機卻響起了，是一個陌生的電話號碼。

「喂！細佬？咩事呀，你唔好喊住先？咩話？我依家即刻過嚟！」阿忠聽完電話後，變得非常緊張。

「咩事呀？」Tina 緊張地問。

「阿爸入咗院，我依家去醫院搵佢！」阿忠邊說邊尋找的士。

「我同你一齊去，呢個時間好難截車㗎，我Call 的士！」Tina 邊對阿忠說邊拿起電話。

半個多小時後，他們終於來到醫院。

「老竇！」阿忠跑進了一間病房，只見忠爸躺在床上，看似沒有甚麼大礙。

「細聲啲啦，醫院嚟㗎！咦，Tina 你都嚟咗呀？」

「係呀世伯，你無事嘛？」Tina 關心地說。

「哈哈，無事，邊有事啫，你睇我幾健康。要你特登入嚟探我真係唔好意思啦，衰仔，我無嘢啦，快啲繼續陪Tina 啦！」忠爸微微屈起右手，展示右臂上那瘦弱的肌肉。

「咩無事呀？細佬呢？佢頭先喊晒咁打畀我，究竟發生咩事？」阿忠緊張地問。

「你細佬同啲差人喺出面落緊口供，好小事......」忠爸說到一半，阿忠忍不住打斷他。

「咩話？落口供？」阿忠語氣錯愕。

「頭先隔籬黃生又同佢個女嘈，可能佢飲咗啲酒啦，又拎住把刀話要劈死佢，我驚有咩事咪過去幫手勸交囉。咁我勸佢放低把刀嗰陣，可能佢醉咗啦，放低嗰陣唔小心整親我囉。」忠爸解釋，並輕拍阿忠表示無事。

「你整親邊呀？手？腳？定邊度呀？」阿忠仍然不放心。

「左腳啫，無事啦，其實都唔係好傷，係你細佬夾硬要我嚟醫院！」忠爸展示左腳上的傷勢，的確不是太嚴重。

「上次都提過你㗎啦，下次你唔好再去勸交啦！隔籬屋真係痴痴地，我聽日就去叫佢唔好再發癲！」

「算啦阿仔，聽講黃生個女好似有咗呀，佢男朋友唔要佢，咁佢老竇咪話去搵個男晦氣，又要佢個女落咗個仔！所以呢排先會日日嘈啫！同埋黃生最近又失業無嘢做，體諒下啦仔！」

「佢哋慘啫，依家搞到我哋喎，我......」阿忠話說到一半，被Tina 打斷了。

「阿忠，唔好講啦，世伯受咗傷要休息㗎！我哋都係走啦，畀世伯休息下，聽日再嚟接世伯啦！世伯，我會睇住阿忠㗎喇！」Tina 明白兩父子再吵下去也不是辦法，所以盡快帶阿忠離開。

「哇，搞一搞已經咁晏，我送你返去啦。」

「唔使啦，我自己搭的士返去得啦！最多我落車之後同你傾電話，傾到我平安返屋企嘞。」

Tina 拒絕了阿忠的提議，阿忠知道說不過Tina 只好放棄。

翌日，阿忠正想到醫院替忠爸辦理出院手續時，鄰居又吵起來了。

「衰女，你知唔知醜㗎！搞大咗個肚都算啦，依家個賤男唔要你，你仲想生佢出嚟？

唔得，我今日一定要帶你落咗佢！」黃生拿著酒瓶，看上去有點醉意，說到激動處時，更想強行拉走她女兒。

「我講咗幾多次，我唔會落呀，你唔理我又好唔認我又好，我都會生佢出嚟！你唔好再喺度發癲啦，噚日你已經搞到鄰居受傷㗎啦，再嘈落去陣間差人拉你唔好喺度怨！」女兒甩開了她父親的手。

「發癲？你話我發癲？我就發癲畀你睇！」黃生話音剛落，便立即衝進廚房，黃生女兒見狀便奪門而去。

她打開鐵閘後，黃生剛好從廚房走了出來。

那一刻，走廊上的阿忠跟那女孩無助的眼神對上了。

女孩的行動還算敏捷，她本想往升降機方向逃去，但當她察覺到父親正追出來時，無可奈何下只好選擇躲在阿忠背後。

「衰女！你匿去邊呀，同我死過嚟！」看來黃生還是有點理智，至少他看到阿忠時沒有把刀砍向阿忠。

「黃生你冷靜啲先，有咩慢慢講啦，你個女有BB 㗎，有咩事就唔好啦！」阿忠實在忍不住開口了。

「關你咩事呀？你再出聲我連你都斬埋！」黃生的舉動也驚動了住在對面的師奶，只見那師奶正在打電話，大概是在報警或連絡大廈保安吧。

「斬我？尋晚我老竇已經被你整傷咗！我都未同你計！你再喺度發癲我就報警等你入去拘留所慢慢嘆！」阿忠也被黃生惹火了。

「發癲？你都話我發癲？好呀，你同個衰女都睇我唔起，當我癲呀嘛！我就斬死你哋之後再自殺！」黃生一時激動起來，把刀砍向阿忠。

幸好阿忠已有所戒備，雙手緊緊抓著黃生手臂，不讓他亂來，而在混亂期間，升降機門打開了，黃生的女兒趁機逃跑。

「衰女你走呀！夠膽你唔好返嚟！你一返嚟我就斬死你！」黃生雙手雖被阿忠抓著，但仍然不忘恫嚇他女兒。

「唔使你斬死我！你咁唔鍾意我咁想我死，我依家就去自殺！」黃生女兒進了升降機後，轉過身來哭著大喊。

「好呀！自殺都好過你唔知醜生個雜種出嚟！唔好被我知你無死呀！」黃生說了這句話後，升降機門便關上了。殊不知這句說話，成為了他和女兒最後的對話。

黃生女兒離開後，華叔不久便帶著警察上來。

黃生的情緒愈見失控，經過了一輪工夫後，總算在無人受傷的情況下，把黃生制伏了。

接了忠爸回家後，阿忠跟他說了今天的事，並千叮萬囑以後假如真的發生甚麼事，趕緊報警就是了。忠爸為免阿忠擔心，也只好答應。

翌日醒來，已經是中午十二點，阿忠難得的能夠睡到這個時間。

「早晨呀老竇，咦？！？！」阿忠摸著凌亂的頭髮，悠閒的從房裡走出來，卻被嚇了一跳，因為他看見Tina 正和忠爸一起看電視。

他一臉不解的看著Tina。

「仲早你個頭咩，Tina 晨咁早入咗嚟同我飲茶啦！快啲去洗面刷牙，陣間我哋出去食飯！」忠爸催促阿忠，害阿忠連詢問Tina 緣由的時間都沒有。

「Tina，唔使理個衰仔，我哋繼續傾啦！買樓嗰邊呢......」阿忠在進入洗手間時，隱約聽到忠爸像在跟Tina 討論著甚麼，但又聽不太清楚。

梳洗過後，阿忠回到大廳裡，只見Tina 的臉色好像有點尷尬，但又有點高興似的，連阿忠也猜不透她此刻的心情。

「好啦，你兩個慢慢拍拖啦！ Tina，頭先講啲嘢我會去搞㗎啦，放心啦！」忠爸在吃過午餐後，便打算先行離開。

Tina 本想說些甚麼，但忠爸把食指放在嘴唇上，示意Tina 不要作聲後便離開了。

阿忠在一旁看著兩人你來我往的，感覺奇怪但又好像插不上話。

直到晚上，阿忠送Tina 回家時，終於忍不住問：「你今朝點解咁早過咗嚟嘅？阿爸同你講咩呀？」

「無......無呀，世伯叫我過嚟陪佢飲茶啫。」Tina 每次有事隱暪時，說話便會變得斷斷續續，這當然不可能逃過阿忠的法眼。

「真係？」阿忠沒有多問，只是用懷疑的眼神看著Tina。

「你唔好咁望住我啦！世伯唔畀我講㗎！不過......」Tina 支吾以對。

「不過咩呀？你哋究竟傾咗啲咩啫？」

「我其實都覺得唔係咁好......你返去問世伯啦！我唔想搞到好似我爆出嚟咁......」看得出Tina 有所顧慮，阿忠也不再追問。

傍晚回到家中，忠爸正在客廳看著電視，阿忠便直接問起：「老竇，今朝你同Tina 傾咗啲咩呀？」

「吓？哦！無呀！我耐無見Tina，咪叫佢入嚟陪我飲茶囉！ Tina 真係好乖女，咁遠都晨咁早入嚟陪我！娶得過呀阿仔！」忠爸笑著說。

「老竇你無啦啦講咩呀，咩娶得過呀？唔好諗住扯開話題喎，我問Tina，佢又依依哦哦咁叫我問你。」阿忠繼續追問。

「吓？無呀！夜喇，我瞓先喇！總之你唔使擔心啲咩㗎啦，Tina 好女仔嚟㗎，對人好啲呀！」忠爸說完便回房睡覺了。阿忠也拿忠爸他沒有辦法，只好暫時放下，反正應該不會是甚麼奇怪的事吧。

第二天早上，阿忠準備回公司的時候，他又在走廊上遇到黃生。

只見黃生的臉比之前來得瘦削，而且臉色變得灰灰沉沉，再配上他那黑色的大眼袋，令人感覺十分不安。

當黃生轉過身來，眼神和阿忠有所接觸時，雙眼明顯散發出怒火！

「係你！係你！你快啲畀返個女我！畀返個女我呀！」黃生向前撲向阿忠，雖然沒有手持任何利器，但感覺比之前拿著刀子時更加兇狠。

「痴線，我都唔知你講咩？你再發神經我報警㗎喇！」阿忠嚇得公事包都掉在地上，勉強才能抓著黃生。

「畀返個女我！畀返個女我呀！求下你畀返個女我啦！嗚嗚......求下你......」黃生被阿忠抓著，掙扎了一會後，便雙腳跪了下來，兩眼不斷湧出淚水，看上去好不可憐。阿忠看見黃生這個樣子，也反應不來。

「嗱......黃生，我真係唔知你講咩！有咩事都好，冷靜啲先好無。」

「我個女唔見咗......我個女唔見咗呀......求下你做下好心畀返個女我啦！求下你！」

黃生突然對著阿忠叩頭，嚇得阿忠有點不知所措。

「黃生，你冷靜啲先，我真係唔知你講咩喎！你話個女唔見咗，佢幾時唔見㗎？會唔會去咗朋友度？」阿忠本想就此離去，但看到黃生這可憐的模樣，又於心不忍。

「佢兩日無返嚟屋企啦，前日我被人拉咗返差館，之後我返到嚟唔見佢，以為佢發脾氣啫。點知佢到依家都無返過嚟，打佢手機又未能接通，佢......佢會唔會出咗事......我嗰日唔係講真㗎......我唔係想佢死㗎......我......」黃生說到一半，又伏在地上痛哭了。

「你冷靜啲先黃生，可能你個女仲嬲緊唔聽電話啫！今日星期一，可能佢已經返咗公司呢，你試下再搵下佢。如果都無嘅話你去報警啦。你個女......應該無事嘅。」阿忠不想再跟黃生繼續糾纏，便匆匆上班去。

一天結束後，回到天恒邨的阿忠，又看見華叔跟那幾位師奶在聊天。該不會黃生在找到他女兒後，又再次吵起來吧？

「華叔，今日又咩事呀？」阿忠好奇地問。

「黃生今日走咗去報警，佢個女好似失咗蹤！」華叔小聲說。

「吓？唔係啩？」阿忠憶起今朝跟黃生的對話。

「聽講黃生搵晒佢個女啲朋友、公司同事，就連佢個女會去嘅地方都搵過晒，但都係搵唔到。我頭先見到黃生個樣，憔悴到呢......」華叔同情地說。

「都唔知佢個女會唔會已經......」其中一位師奶說，其他人也不禁靜了下來。

星期六的早上，突然有人拍阿忠家的大門。

阿忠開門後，只見有數名軍裝警員站在門外。

「先生，唔好意思，想問你少少嘢嘅。」站在前頭的警員開口說。

「哦......可以，可以。」他們正是來調查黃生女兒失蹤的事情。不知怎的，阿忠直覺上認為黃生的女兒並不是單純的躲起來。

又過了數天，這晚上阿忠看見黃生竟在管理處那邊大吵大鬧！

「講呀！你係咪做咗手腳呀？講呀！好地地點會咁先得㗎！」黃生憤怒地說。

「我無呀，之前啲差人咪嚟咗囉，佢哋睇過都話無問題！同埋我又點識整呢啲嘢先得㗎。」華叔無奈地說。

「唔係你啲片又點會咁奇怪？出咗問題幾秒就唔見咗我個女！唔係你搞係邊個？」黃生用力的拍在管理處桌上。

「黃生！我點知點解啫！我喺度打工啫，唔係咩都知㗎！真係有古怪嘅，啲差人都拉咗我啦，係咪先？」華叔明顯有些動怒，要不是他是在這裡工作，應該已經扔下一堆髒話後離去了。

黃生聽完後，不知是甚麼原因，口中不斷邊重複著「女，你喺邊呀？」邊乘升降機回去。

「華叔，黃生又搞咩呀？」阿忠好奇地問。

「唉，咪又係佢個女單嘢囉！黃生拎住把刀同你爭執嗰日，黃生嗰女咪自己搭走咗嘅，啲差佬走嚟翻睇閉路電視嗰陣，發現黃生嗰女入咗之後，閉路電視出現咗一至兩秒

嘅故障，畫面黑晒，跟住有返畫面嗰陣，黃生個女竟然唔見咗！故障前同故障後部都係顯示十四樓，部又無開過門，黃生個女居然就咁消失咗。」華叔也大惑不解。

「吓？唔係啩？」阿忠也覺得奇怪。

「我都想唔係，嗰日睇完我都呆咗！」華叔嘆了口氣。

「咁差人點講呀？」

「差人？咩都無講，拎咗段片就走咗啦！黃生知道咗就落嚟發晒脾氣咁！唉，再咁嘈落去我實被人炒都似！」

以為這事情已經夠怪異了，誰知接下來又出其他事故了。

自從黃生知道自己女兒神秘失蹤後，幾乎每天也跟華叔吵起來，而且，自那天起，阿忠幾乎每晚也可以聽見黃生的嚎哭聲。哭泣聲中，阿忠還隱約聽到黃生重複著「阿女你返嚟啦，要死嘅話我代你死啦！」、「阿女你係咪走咗啦，阿爸好快都落嚟陪你！」......

某天，剛離開家門的阿忠碰上了又準備下樓找華叔麻煩的黃生。看到黃生那種絕望但帶著怒火的眼神，阿忠心裡不禁微微打了一個冷顫。

黃生看到阿忠後，並沒有理會他，轉過身去準備乘升降機下樓。

「黃生！」阿忠也不知道原因，但他就是喊了出口。

黃生聽到後，回頭看著他，眼裡射出不友善的目光。雖然他沒有開口，但感覺就是對阿忠說：「有屁就放，唔好嘥我時間！」

「你......你係咪落去搵華叔？」

黃生沒有說話，仍然只是盯著阿忠。

「其實，你咁樣日日落去搵華叔，會搞到佢好麻煩㗎，佢都係打份工啫，你不如......」

阿忠說到一半，黃生總算開口了。

「我搞到佢？打份工？咁我個女點呀！佢依家喺呢棟大廈失蹤呀！閉路電視咁啱又出問題！我唔搵佢搵邊個呀！你教我呀！教我呀！」黃生一開口便像是想殺了阿忠一樣，非常激動。

「你個女失蹤無人想㗎！同埋如果華叔真係有嫌疑，差人會做嘢㗎啦！你又何苦......」

「試下你老竇失咗蹤呀，睇你會唔會咁淡定，你都痴線㗎，唔好再阻頭阻勢呀！」黃生眼中透露出的怒火，彷彿要把阿忠整個人吞噬。

「我......我唔係想阻你......不過，你落去搵華叔......佢都......」阿忠的說話再一次被黃生打斷。

「你唔好再講啦！無咗個女嘅感受你明咩？你明條春呀！係咪我落去搵人都唔得呀！

係咪咁都要你管呀！你係咪想逼死我呀！吓！」黃生那種歇斯底里看來已經去到不能控制的地步。

「黃生，我唔係咁嘅意思，你......」

「咩唔係咁嘅意思呀！你係！你咁想逼死我呀嘛，我落去搵完嗰條賤人之後就自殺畀你睇！咁想我死！你班賤人！我就死畀你哋睇！！！」黃生邊咒罵著邊走進升降機並關上了門，餘下阿忠一個留在原地不知所措。

「唉......死火，遲到！」阿忠看了看手錶後，便跑到下層乘坐升降機離開。

在經過大廈大堂的時候，阿忠並沒有見到黃生在和華叔爭吵，雖然略感奇怪，但由於時間關係，也沒有多加在意便離開了。

當再次下班回到天恒邨時，阿忠才有時間跟華叔談起早上的事來。

「華叔，今朝黃生佢無落嚟同你嘈咩？」

「咦？你講起又奇喎，今日完全無見過佢。會唔會佢終於諗清楚唔關我事呢？」

「吓？我今朝先喺走廊撞到佢，我諗住叫佢唔好搵你麻煩，點知就被佢鬧咗一鑊啦！」

「可能你同佢講完佢諗通咗呢！我早兩日已經被公司嗰邊警告，再有住客落嚟同我嘈就唔使我再返呢度啦，今次真係唔該晒你呀忠仔！」華叔高興的拍了拍阿忠的肩膊。

「客咩氣呀，係佢做得太過份我忍唔住啫。不過，我唔覺得佢會就咁算囉！」阿忠始終不相信黃生會就此罷休。

「唔緊要啦，過得一日得一日啦！同埋佢唔見咗個女又真係幾慘嘅。」

這種平靜的日子維持了三日後，一批警員又再次造訪這棟大廈。

詳情雖然不太清楚，但據黃生對面的師奶所說，那批警員在黃生單位拍門很久都沒有回應，過了一會後，消防員也就來到現場爆門。

令人感到疑惑的是，為甚麼警員會再次上來調查，肯定有甚麼因由。

就在眾人都處於一片迷霧之中、得不到答案之際，網上竟廣泛流傳著兩段影片。兩段影片相信是來自同一部升降機的閉路電視，影片時間並不算長，每段只有約三十秒。

片段一中，可看見一名少女進入升降機，隔了數秒後，閉路電視的畫面出現了劇烈的晃動，影像變得模糊不清，這情況維持了約一至兩秒，少女便離奇消失了。另一片段也是差不多的情況，只是主角由少女換成中年大叔而已。

而片段上載不久後，在這資訊流通的年代，幾乎所有資料都被查出來了。片段中就是住在天恒邨的黃氏父女、阿忠的鄰居，而謠言亦慢慢在大廈住戶間傳開去。

「你哋有無睇到段片呀？好驚囉！」陳師奶說。

「睇咗呀，不過好多人話假㗎喎！」李師奶說。

「造假？我又覺得唔似喎！同埋，黃生父女真係失咗蹤喎！」張師奶說。

「係囉，幾鬼得人驚呀，搞到我依家都唔係好敢搭！」鄭師奶說。

「你都好呀，住喺三樓！我就住喺黃生對面，十八層呀，焗搭囉！」張師奶說。

之後謠言更愈傳愈誇張，有很多大廈的住戶都聲稱看見黃生父女的鬼魂在樓層間徘徊，更有人聲稱在升降機內聽到有把聲音說：「十八樓唔該。」，但升降機裡根本沒有其他人存在。

那些不盡不實的傳言像瘟疫般四處蔓延，幾乎整個天恒邨的居民都知道了黃生父女失蹤和一連串的怪異傳聞。

整棟大廈，以至整個天恒邨，都瀰漫著悲傷和不祥的氣氛。

「唉，最近條邨都唔知搞咩，啲人係咁傳埋晒啲奇怪嘢，搞到人心惶惶咁。」阿忠和Tina 吃晚飯時，提起邨內發生的怪事。

「我都有睇到條片呀，會唔會只係有人造假博出位？」Tina 分析。

「唔知呀，不過呢排條邨啲風氣都差咗，成日有啲童黨喺度扮鬼嚇人，又乘機偷嘢搶嘢咁！如果可以搬就好啦！」阿忠最後不經意提起的「搬」字，卻令Tina 臉色稍變。

「係......係咁㗎啦，混水摸魚嘅嘢周圍都有。呀，係呢，你......同世伯傾咗未呀？」

「傾？傾咩呀？」

「上次你咪問世伯同我講咗啲咩嘅？你返去無問佢咩？」

「有呀，但見佢好似唔想講咁。同埋呢排又發生咁多事，咪無再問囉。做咩呀？好重要㗎？你講啦。」

「吓？其......其實......」Tina 支吾以對。

「其實咩啫？」阿忠追問。

「唉，其實之前世伯叫我上去，佢同我講買樓嘅嘢！佢話佢會用佢啲錢幫你畀首期，之後就等我哋去供。我已經同佢講咗唔使㗎喇，但佢好堅持，又話會說服你。本來我嗰日諗住同你講，但係......」阿忠聽著忽然生氣起來。

「咩話？痴線啦，我同佢講咗好多次啲錢留嚟自己用㗎嘛！買咩樓啫！你又係嘅，咁大件事都唔同我講，都唔知佢會唔會已經走咗去睇樓，老竇咩都唔識又無買過樓，陣間被人呃點算！你分下輕重呀嘛，咁都唔同我講！」阿忠連珠炮發，Tina 被罵得滿臉通紅。

這也難怪，因為阿忠的母親在他小時候已經離世，兩兄弟都是父親一手養大的，在經過多年辛勤工作後，父親已經捱出不少病來，所以阿忠除了對父親很孝順外，亦很希望父親至少在退休後能享享清褔。他連想都沒有想過要動用父親那些辛苦儲下來的錢。

「之前咪同你講過囉，我計劃緊㗎嘛！又唔係唔買樓，又唔係唔結婚！依家要老竇出錢買樓，之後仲要同佢分開住，咁樣你住得安樂咩？你呀......」阿忠毫無間斷的說話，Tina 終於忍不住爆發了。

「好囉喎謝兆忠！我咪講咗我有勸佢唔好咁做囉！之前仲特登提你返去同世伯傾，係你自己唔去傾！依家你走嚟怪我？你老竇決定嘅嘢你覺得我真係阻止到佢咩？你講呀！」

「喂，依家唔係話你阻唔阻到佢呀！問題係你唔同我講呀嘛！你一早講咗，我去同老竇傾咪無事囉！你又要拖拖拖拖拖，拖到依家先同我講，你係咪諗住等老竇買晒樓先講，到時當講咗呀？樓啫，唔買咪租囉，都唔明你咁想要做咩！所以話你......」

「夠啦！你咁講啫係話我特登呃你，同埋諗住呃埋你老竇啲錢啫！話要買樓嗰個唔係我呀！」

「我無話你呃呀！你自己講㗎！同埋你成日催我買樓，你聽到老竇同你講話幫我哋畀首期實好開心啦！都唔知係咪你同老竇講咗啲乜先咁樣！」每次只要扯到跟他家人有關的話題時，阿忠都會變得難以控制自己的情緒，只是，這次的說話已經觸及Tina 的底線。

「好！你唔信我！你講到我咁貪錢，咁乞人憎！再係咁落去都無意思！分手啦！」

Tina 早就在被阿忠懷疑時落下淚來，當她把話說完後，頭也不回地離開了。

「分手？分啦分啦，分飽佢！」阿忠也被怒火遮蔽了雙眼，已經完全把Tina 當成是貪錢的女人。

在回家的途中，阿忠開始慢慢冷靜下來，Tina 說的話才在他腦海內發酵。

「Tina 又真係無講到大話......以老竇嘅性格，佢自作主張真係唔奇......」

「唓，就算係咁，佢唔同我講都有問題啦！」

「佢又好似真係有提我喎......」

阿忠內心就這樣交戰著，回到家後，他馬上跟忠爸確認。

雖然忠爸一開始還矢口否認要替他付首期，但在聽到阿忠和Tina 的吵架內容後，才坦承他是有計劃這樣做，Tina 並沒有教唆他，反而有勸他不要這樣做。

「即係話，成件事都唔關Tina 事？」

「梗係唔關佢事啦，衰仔你仲唔快啲去搵Tina 講清楚。」忠爸催促。

「吓？咁......咁......」一小時才剛嚷著分手，阿忠實在不覺得Tina 會那麼容易原諒他。

「你咪拖拖拉拉啦！你今日唔講清楚，Tina 真係會同你分手㗎！快啲去啦，打電話去同佢講你依家去搵佢啦！」見阿忠猶豫不決，忠爸把他推了出家門，然後關上了大門。阿忠不斷在門外踱步，想了好些時間，他決定先致電給Tina，可惜幾通下來Tina 都沒有接聽，於是他決定直接去找Tina。

同一時間，他隱藏了號碼致電給Tina，想不到這回真的接通了。

「喂，Tina，阿忠呀，你唔好收線住，我想講呢，我啱啱同阿爸傾完，知道唔關你事，我想同你講對唔住呀，原諒我啦！」阿忠緊張地說。

「咁你講完啦嘛？我收線喇！」另一邊廂Tina 正準備掛上電話。

「唔係呀Tina，對唔住呀！係我唔好，你知我都係緊張我老竇先會咁樣啫。你唔好嬲啦，我依家即刻過嚟搵你！」

「你唔使過嚟啦，我無嘢想同你講！你要講嘅嘢我都收到喇！係咁啦！」Tina 冰冷的語氣，透露的是徹底失望。

「Tina，唔好咁啦，好小事啫！我都同你講咗對唔住啦！就入未必收到喇，我好快嚟到！」阿忠這句說話，卻點燃了Tina 的怒火。

「小事？你話係小事？依家講緊嘅唔係錢問題、唔係買唔買樓問題，係你懷疑我去呃你老竇呀！你今次懷疑我呃你老竇，下次你會唔會懷疑我呃你細佬呀？你根本就唔信我！

你咁唔信我嘅話我哋再一齊都無意思！就算你過嚟我都唔會見你，我已經死心啦！就當我睇錯人啦！」Tina 氣憤地說。

「Tina ！唔係㗎，頭先我一時火遮眼先會咁。你要點先原諒我，你講啦？」阿忠邊踏進升降機邊問。

「謝兆忠！你根本唔明，根本唔係咩火遮眼問題！而係你根本唔信我！！！你想知點樣先原諒你呀嘛？你去死啦！」話音剛落，電話裡便傳來「嘟—嘟——」的聲音。

「Tina ？」阿忠的叫喊已再也傳不到Tina 那裡了。

「再打多次！垃圾電話收唔到！」

在升降機一直往下的時候，阿忠心裡不斷回想著Tina 的說話。「我都唔係真係唔信佢......我只係關心我老竇啫......」阿忠心裡大概明白，自己的說話對Tina 來說有多大的傷害。

Tina 最後的說話，不斷出現在阿忠的腦裡，自責的阿忠彷彿看到Tina 就在自己眼前逼迫著他。

「去死去死去死！咁我去死啦好未？」彷彿為了驅散腦海中Tina 逼迫自己的形象，他半發脾氣半認真的大喊了出來！

就在他大喊的同時，燈光突然閃動約一秒的時間，而升降機也不自然的晃動起來。

「唔係壞咁黑仔呀？」阿忠心裡嚇了一嚇，升降機卻恢復正常繼續下降。

安心下來的阿忠，仍然想著Tina 的說話，亦在思索著如何去求得Tina 原諒。

可能由於太過專心的緣故，阿忠絲毫沒有察覺到升降機的異變。

升降機正徐徐的往下移動，電子螢幕上的數字，不知甚麼時候超過了G 樓，正從「-1」慢慢的下沉，一直來到「-18」，門終於打開了。

當升降機已到達底層，阿忠便下意識快步踏出去，準備再致電Tina，但當他抬頭時，第一眼映入眼簾的，是一個大大的「-18」，這個字刻印在一面血紅色的牆壁上！

阿忠還沒有來得及細想，便已聽到背後傳來「轟隆」的聲音，他回頭一看，發現他剛剛乘搭的升降機，已變成一個漆黑的四方形空間。他走近去看，猜想整部升降機已經墜落那無止盡的深淵之中！

「呢度......到底係咩地方......」阿忠環視了四周，不禁在心裡提出了這個疑問。

然後他第一時間做的，便是用雙手狠狠的拍打自己的臉龐。

手心和臉上傳來的陣陣刺痛，還有刺痛中帶來的溫熱感，都在告訴阿忠，這一切都不是夢！

「痴線......無可能......我一定係發夢！」阿忠雖然清楚地感受到痛楚，但還是不願意接受眼前的境況。

這也難怪，因為阿忠身處的這個地方，實在很難令人和現實連結起來。

除了「-18」這個無法解釋的數字外，四周的牆壁除了都是血紅色外，牆壁上還有一條一條像是血管的東西在脈動著，看上去十分詭異！

地板看上去亦十分嚇人，布滿著一個又一個的水窪，但那些水窪，有些是暗紅色，有些是墨綠色，而且水窪不斷冒出泡泡和一些看似熾熱的蒸氣，教人不敢接近。最令人倒胃口的是傳出來的氣味，比堆填區的垃圾更令人作嘔。

在這個嚇人的地方中，在原本升降機的正前方，亦是那道刻有「-18」的牆壁上，有一扇門突兀的嵌在那裡。

那扇門散發出一種令人非常厭惡的感覺，它那漆黑的表面隱約滲透出一絲絲的紅光，而且，當阿忠注視著眼前的大門時，他彷彿聽到一陣悲鳴，一種接近死亡的嚎叫聲，教他湧上不寒而慄的感覺！

阿忠不斷對自己說：「假嘅！假嘅！唔係真㗎！」即使換了別人，太概也很難接受眼前不是夢吧！但阿五官帶給他的感覺實在太強烈，即使這是一個夢，他也不想再繼續待下去。

既然巴掌的熱辣疼痛不能令他清醒過來，與其坐以待斃，阿忠決定行動起來。

他四處觀察，小心翼翼避開地上那些水窪，走到那道詭異的大門前。他發現門的體積十分龐大，比他足足高了一倍有多，大概有四米左右吧，只見大門的兩側，左側寫著「一念生」，右側寫著「一念死」，而在大門的上方，則寫著「生死於一念間」！

「乜鬼嘢呀？佛偈呀？呢道門都係唔開好啲......」阿忠有一剎那想過推開這道門，但一陣強烈的不安感向他襲來，使他放棄了這個念頭。

阿忠轉頭發現在升降機空間旁另有一道小門，他猶豫了好一會，確定沒有其他地方能前進後，只好往這道門走去。

現在，阿忠只有一個想法，就是盡快逃離這場「夢境」。

推開大門後，是一條非常漆黑的通道，只有一點微弱的光線從遠方透過來。

阿忠沒有多想，便決定向著光芒進發。

隨著阿忠身後的大門關上，那房間裡的臭味和強烈的不安感也同時消失。阿忠更加肯定，他的選擇是沒有錯的。

他加快了腳步，希望盡快到達光芒之處，他以為走出通道後，便能離開這個鬼地方。

正當快要到達盡頭時，他突然聽到「呀」的一聲慘叫，那震耳欲聾的巨大迴音，彷彿是野獸死前的吼聲一樣。

阿忠被這突如其來的叫聲嚇得停下了步伐，不知道應否繼續前進。那叫聲維持了若三秒左右，之後又回復一片寧靜。

隔了好一陣子，阿忠見沒甚麼動靜正想繼續前行之時，那慘叫聲再次傳入他的耳內，使他再次猶豫了。

當慘叫聲反覆響起數次之後，阿忠發現這慘叫聲是有規律的，每隔某段時間就會出現。

再三思量後，他實在不想回到剛剛那個又臭又令他感到厭惡的空間，所以他選擇繼續前進。

當阿忠來到出口時，他看到一幕更加奇怪的景象。

在這四周都是血紅色、大約有一個籃球場這麼大的地方，他望到在中央之處，有一個人全身赤祼、正呈「大」字形的被捆綁在長方形的平台上。而平台的兩邊，則各站著兩個身穿紅色衣服的人。

接下來的情景，是他人生中看到過最嘔心和恐怖的事情。

那兩個穿紅衣的人，合力拿起了一把大鋸放到那人的襠部，然後慢慢的，由襠部開始一直向上移動。

那人的身體被劏開的時候，不斷發出淒厲的慘叫聲。

在那大鋸劏開人的身體時，只見大量的血液噴濺而出，落在那拿著大鋸的二人身上，原來那二人身上的並不是紅色衣服，而是被鮮血染成這種顏色。

大概三秒過後，那人已經徹底死去，血液和內臟都掉到地上。看到這一幕的阿忠立刻嘔吐大作，差點連胃袋都吐了出來。

而接下來的畫面更加可怕，只見兩名紅衣人放下了大鋸，把地上的內臟一一撿起來，慢慢的重新塞進那人的體內。確定所有內臟都放進去後，兩名紅衣人把那本應已經一分為二的身體重新拼湊在一起。

之後，那人慢慢的恢復了血色，一陣子後更張開了眼睛。

阿忠早已嚇得目定口呆，思考功能已經完全停止，但接下來，卻容不得他再這樣發怔下去。

因為，那個死人恢復了血色之後，瞪大雙眼朝阿忠看去。

阿忠還沒有回過神來，那人突然大叫：「有人！嗰邊有人！捉佢過嚟！同我一齊受苦啦！哈哈哈哈！」

那人大叫了一聲後，兩名紅衣人轉過身來，「看」著阿忠。

阿忠的腦袋本來已經一片空白，當那兩人用那沒有五官的臉朝著阿忠時，阿忠的身體不自覺顫抖起來，手腳早已發軟的他無法隨意移動，只能眼睜睜看著那兩人慢慢走向他，想到自己將會被那大鋸劏開，眼淚不自覺就流下來。

就在那兩人不斷接近阿忠的時候，他感到自己被甚麼抓著自己右手，用力的拉走，但他的身體實在跟不上被拉走的速度，遂一下子仆倒在地上。

「起身啦！被佢哋捉到就麻煩啦！快啲行啦！」一把女聲傳進阿忠耳內，他抬頭一看，竟然是黃生的女兒。

「唔好望啦，快啲啦，佢哋就嚟喇！」

阿忠總算見到一個活人，像是溺水的人遇到浮木一樣拚命抓緊，也開始恢復了行動力。

於是，阿忠跟著黃生的女兒來到一條通往上層的樓梯，當兩人踏上階梯後，兩名紅衣人好像對他們失去興趣般，慢慢離開了，然後隔了一會兒，那淒厲的慘叫聲再次傳來。

「吁吁！吁吁！點解你會喺度㗎？呢幾個星期你就係留咗喺度？」阿忠喘著大氣問。

「吓？咩幾個星期呀？我喺度應該幾個鐘左右啫！仲有，我反而想問你點嚟呢度㗎？

係咪有辦法走？」黃生的女兒問。

「吓？幾個鐘？」阿忠雖然不明白，可是怪事接二連三，這已不是思考這個問題的時候。

「你......你知唔知，唔係......你覺得呢度係咩地方？」雖然阿忠從那些奇怪的數字和情景隱約猜到，但他還是希望能被否定。至於他到底想得到一個甚麼樣的答案，大概便只有他自己才知道了。

「呢度......呢度......係地獄！」黃生的女兒說。

「地獄？痴線......痴線......無可能㗎，點會......」阿忠聽到這個答案後，便開始像發了瘋般搖頭，不想接受這個事實。

「你接受唔到都無辦法......頭先嗰個被綁住嘅人，你應該都識佢。」黃生的女兒說。

「我？我點會識佢......不過......佢又真係有啲熟口面......」阿忠被這樣提醒後，發現的確有似曾相識的感覺。

「就喺半年前，有一單好轟動嘅新聞，呢個男人係一間大型建築公司嘅老闆，其中一棟大廈完成工程之後發生火災，先被人揭發佢公司承辦嘅大部分工程都偷工減料，無幾耐仲喺呢頭附近遇到交通意外死埋！」

「我......我有啲印象！但佢明明死咗㗎？點解......」阿忠終於明白黃生的女兒為甚麼會說這裡是地獄了。

「無錯......如果唔係地獄，我哋無理由再見到佢。」

「咁......咁我哋咪即係......」阿忠心裡泛起了一個念頭，卻不敢說出來。

「但明明我仲可以感受到肚入面嘅BB ！」

阿忠見她說得如此肯定，也不好說話，但他心裡卻希望她說的話是正確的，畢竟，他還是想活下去的。

兩人坐在樓梯上休息，沉默的氣氛使兩人變得尷尬，阿忠決定首先打破寂靜。

「係......係呢，我叫謝兆忠，你可以叫我阿忠，你叫咩名呀？」

 

 

 

source: pakutaso

 

 

「Christy ！」女孩簡單地回答。

「Christy，你話你嚟咗幾個鐘，咁你呢幾個鐘做咗啲咩呀？有無咩發現？」

「仲可以做啲咩，部又無咗，下面嗰道門感覺又危險，咪向上行囉！既然部送得我哋落嚟，我估應該可以行返上去啩！唔係，係一定行得返上去！」Christy 咬牙切齒地說，她對生存的慾望看來十分強烈，難道這就母親的力量？

「咁點解你會落返嚟下層嘅？」阿忠在說這句話時，Christy 眼神瞬間變得有點兇狠，但很快又回復正常了。

「因為我上到去某個層數嘅時候，被嗰度嘅怪物發現咗，之後佢哋一直搵我，搞到我無辦法再上去，所以先落嚟睇下有無咩嘢可以用，等我可以繼續向上行！點知咩都搵唔到，落到嚟就見到你喺度啦！」

「吓？咁咪即係無辦法上去囉？」阿忠擔心地問。

「原本係，依家唔係！」Christy 用手指向阿忠。

「我？」

「無錯，兩個人嘅話，應該有辦法過到去。你休息完未？休息完我哋就上去啦，我唔想再留喺呢個鬼地方！」Christy 一字一語都是這麼強而有力，但......總感覺有點奇怪，卻又說不出所以然來。（未完待續）

 

 

 

本文摘自《香港都市傳說》

 

傳說一：無法逃離的大廈
網上瘋傳閉路電視片段，
一男一女在天恒邨大廈升降機內憑空消失，
到底是惡意玩笑，還是兩人誤闖「凶間」？

傳說二：4D子夜場之《全院滿座》
三個大學生，一套在旺角子夜開場的《全院滿座》，
謹記：電影尚未放映完畢，
切勿除下3D眼鏡或離座，
否則，後果自負！

傳說三：被詛咒的圍村
每年十二月，圍村別墅特平出租，
卻要嚴守不能帶人進村的規矩。
設計師搬進去後遇上怪事連連……
便宜莫貪，小心有入無出 。

傳說四：不能遇上的熟食攤販
若在深夜街頭，
碰上老婦推車仔賣腸粉，
千萬別胡亂光顧，
貪吃分分鐘害你惡靈纏身。。 

 

 

 

出版社：天行者

作者：心層次